40 anos de "autonomia".

 Hoje completam-se 40 anos da aprovaçom do atual Estatuto de Autonomia da Galiza. Esse Estatuto foi aprovado com o consenso da esquerda e a direita espanhola, com postura contrária do conjunto do nacionalismo galego, com a exceçom de um Partido Galeguista que pouco tinha a ver (abandonando o nacionalismo como tal) já com o do periodo republicano liderado por Bóveda e Castelao.

Com a perspetiva do tempo o Estatuto do 81 supóm umha conquista relativa do povo galego e umha certa concisom por parte do Estado espanhol. Graças a ele existem certas competências "exclusivas" do governo e Parlamento galego, como sanidade ou educaçom, sempre sem contradizer a Constituiçom espanhola. É a base de um autogoverno limitado e submetido á legalidade espanhola. Nom é a base para alcançar a plena soberania nacional, senom o teito que nos impede avançar. Ora bem, apesar de todo isto, como nacionalista e independentista, e acho que nisto mantenho a mesma postura que o conjunto do nacionalismo galego, perante qualquer ataque ou tentativa de retrocesso, defenderei o Estatuto atual e suas competências transferidas a Galiza tanto como quem mais. Acho que na atualidade, deveriamos ter umha relaçom dialética com o Estatuto galego atual, defendendo o que tem de positivo e combatendo-o como obstáculo para atingir a soberania e poder chegar á libertaçom nacional e social através da República Galega. Isto é, o Estatuto deve ser combatido através da sua superaçom e nom da sua supressom que nos poria numha situaçom pior que a atual.