O caráter da opressom na Galiza.

Existe certo consenso na esquerda, com a exceçom de certos seitores minoritários, da existência de opressom cultural e lingüística na Galiza. A existência desta negaçom e minorizaçom da cultura galega é evidente. Mas, é de tipo unicamente cultural a opressom sofrida por Galiza? A resposta é, ao meu ver claramente, um rotundo nom. E nom se trata de umha questom menor, pois certo seitor da esquerda, que chamaria de espanholista pluralista, encontra-se muito cómoda neste reconhecimento meramente cultural de particularidade da Galiza. Mas, como nacionalista e independentista galego, nom é esta minha perspetiva. Galiza sofre opressom nacional num senso pleno, e esta é política num senso integral, abrangendo o puramente político, o económico, o social e o cultural. Neste ponto é onde existe divergência entre a esquerda espanholista pluralista e o nosso soberanismo. Galiza é umha naçom, nom só cultural, senom também política, que carece de soberania em todos os âmbitos, sendo portanto umha naçom oprimida. E esta condiçom política integral da opressom nacional que sofre Galiza, a que fai que a soluçom ao problema nacional galego seja o exercício do direito de autodeterminaçom, que por suposto inclúe o direito á separaçom total da Galiza do Estado espanhol.